بوۋاقلار تۈرلۈك سەۋەبتىن يىغلايدۇ. لېكىن بەزى ئانىلار، بولۇپمۇ، تەجرىبىسىز ياش ئانىلار بۇ سەۋەبلەرنى چۈشەنمەي، بالىسىنى ئۆزىنىڭ بىلگىنىچە بەزلەپ، يىغىدىن توختىتىتىشنىڭ ئامالىنى قىلىدۇ. ئەگەر بالىنىڭ يىغىسى توختىمىسا بالىنى قورقىتىدۇ . بۇ ئىلمىيلىك ئەمەس.
ئۇنداقتا بوۋاق نېمە سەۋەبتىن يىغلايدۇ؟
1. ئاچلىقتىن يىغلايدۇ. بوۋاق ئاچلىقتىن يىغلىغاندا كۆپ ھاللاردا كۆزىنى يۇمۇۋېلىپ، قاتتىق تېپچەكلەپ يىغلايدۇ. قول ۋە كالپۇكلىرىنى شورايدۇ. 

2 . ‹‹كۆتۈر››دەپ يىغلايدۇ . بوۋاق مۇشۇ سەۋەبتىن يىغلىغاندا بوۋاقنىڭ كۆزىدىن ياش چىقمايدۇ ، چىرايىدىن پەقەت يىغلاۋاتقاننىڭلا ئىپادىسى بولىدۇ .

3. توڭلاپ كەتكەنلىكتىن يىغلايدۇ . بوۋاق توڭلاپ كەتكەندە پەس ئاۋازدا ۋە تىترەپ يىغلايدۇ .

4 . ئىسسىقتىن قورقۇپ يىغلايدۇ . بوۋاق ئىسسىپ كەتسە قاتتىق يىغلايدۇ ، قىزىرىپ ، تەرلەپ كېتىدۇ . جېنىنىڭ بارىچە تىپچەكلەپ ، يۆگەكتىن چىقىۋېلىشقا ئۇرۇنىدۇ .

5 . زاكا ھۆل بولغاندا يىغلايدۇ . ئۇياق – بۇياققا تولغىنىپ ئىككى پۇتىنى قالايمىقان تىپىرلىتىدۇ .

6. چۆچۈپ كېتىشتىن يىغلايدۇ . بۇنداق يىغلاش كۆپىنچە كېچىدە بولىدۇ . يەنى بوۋاق كېچىدە ئۇخلاۋېتىپ تۇيۇقسىزلا يىغلاپ كېتىدۇ .

7 . كېسەللىكتىن يىغلايدۇ . بوۋاق زىل ھەم بىر خىل ئاھاڭدا ، بوغۇلۇپ يىغلىسا ، بۇنداق يىغلاش بوۋاقنىڭ مەلۇم كېسەللىككە گىرىپتار بولغانلىقىنى بىلدۈرىدۇ ، بوۋاق بەزىدە كۆپ يىغلىمايدۇ ، تولا تىپچەكلىمەيدۇ . مانا بۇ بوۋاقنىڭ كېسىلىنىڭ ئېغىرلاشقانلىقىنىڭ بىشارىتىدۇر .

   ئەگەر بوۋاقنىڭ يىغلاش سەۋەبى ئېنىق بولمىسا ، كېسەلگە گىرىپتار بولۇپ قالغانلىق ئېھتىمالى كۆرۈلسىلا ، دەرھال دوختۇرخانىغا ئېلىپ بېرىش كېرەك .