يېقىندا شىنجاڭ تېببىي ئۇنىۋېرسىتېتى 1 – دوختۇرخانىسى بالىلار ساقلىق ساقلاش بۆلۈمىنىڭ مۇئاۋىن مۇدىرى، كاندىدات مۇدىر ۋراچ قۇندۇز ئەبەيدۇللانى بالىلار زۇكام بولغاندا پەيدا بولىدىغان ئەگەشمە كېسەللىكلەر ۋە ئۇنىڭ ئالدىنى ئېلىش توغرىسىدا زىيارەت قىلدىم. قۇندۇز ئەبەيدۇللا مۇنداق دېدى: بالىلارنىڭ يۇقىرى نەپەس يولى يۇقۇملانسا، بەزى جىددىي خارەكتېرلىك قورساق ئاغرىقى پەيدا بولىدۇ. كۆپىنچە كىندىك ۋە كىندىك ئەتراپى ئاغرىيدۇ، زۇكامنىڭ دەسلەپكى مەزگىلدە كۆرۈلىدۇ. قورساق ئەگەر قىسقا ۋاقىت ئاغرىسا، كۆپىنچە ئۈچەينىڭ لۆمۈلدىشى ئاجىزلاش ۋە مەددە بىلەن مۇناسىۋەتلىك بولىدۇ. ناۋادا ئۈزۈلمەي ئاغرىسا، جىددىي خارەكتېرلىك ئۈچەي بېغىشى لىمفا تۈگۈنى ياللۇغى بولۇشى مۇمكىن.

   جىددىي خارەكتېرلىك ئۈچەي بېغىشى لىمفا تۈگۈنى ياللۇغى بالىلاردا جىددىي خارەكتېرلىك يۇقىرى نەپەس يولى يۇقۇملىنىش كۆرۈلگەندە پەيدا بولىدىغان ئەگەشمە كېسەللىك بولۇپ، كۆپىنچىسىنى ۋىرۇس كەلتۈرۈپ چىقىرىدۇ. كېسەل قوزغىلىشتىن بۇرۇن قىزىش، كېكىردەك ئاغرىش، پوتلا ئېقىش، چۈشكۈرۈش قاتارلىق يۇقىرى نەپەس يولى يۇقۇملىنىش ئالامەتلىرى كۆرۈلىدۇ. ئاندىن كىندىك ۋە قورساقنىڭ ئوڭ تەرەپ تېگى ئاغرىيدۇ. يەنە كۆڭلى ئېلىشىش، قۇسۇش ئەھۋالى كۆرۈلىدۇ. بەزىدە قەۋزىيەت ياكى ئىچ سۈرۈشمۇ ئەگىشىپ كېلىدۇ. شۇڭا، زۇكام بولغان بالىنى كۆڭۈل قويۇپ پەرۋىش قىلىش، ئەگەر قورساق ئاغرىش ئەھۋالى كۆرۈلسە، دوختۇرغا تەكشۈرتۈش كېرەك.

   ئەگەر جىددىي خارەكتېرلىك ئۈچەي بېغىشى لىمفا تۈگۈنى ياللۇغى، دەپ دىئاگنوز قويۇلسا، ۋاقتىنچە بالىغا تاماق بەرمەسلىك ھەمدە يۇقۇملىنىشقا قارشى دورىلار بىلەن داۋالاش كېرەك. ئەگەر داۋالاش ئارقىلىقمۇ ئەھۋالى ياخشىلانمىسا، جىددىي خارەكتېرلىك سازاڭسىمان ئۆسۈكچە ياللۇغى بولۇش ئېھتىمالى زور بولىدۇ، بۇ ۋاقىتتا بالىنى مۇنتىزىم دوختۇرخانىلارغا ئاپىرىپ سىستېمىلىق داۋالىتىش كېرەك.

( ئەخمەتجان ئىسمايىل )